A chi arrobba sentenno

'O mariuolo ca t'arrobba 'e solde,
si nun sape arrubbà và carcerato.
S''o portano ngalera ammanettato:
«Chesto pè chesto...», e tanto adda scuntà.

Ma chillo ca t'arrobba dint'a ll'uocchie
mentre tu parle 'e nu penziero tuio
e và dicendo doppo ch'è d''o suio,
nun và ngalera. Ma pè cunto mio

stu pover'ommo me fa pena assaie:
è fesso ma se sente sfurtunato.
Nascette c''o penziero carcerato,
e s'arrobba nu poco 'e libertà.

1969